23. desember 2008:

Takk fyrir mig í 8 ár!

Í ársbyrjun 2001 gerði ég mér það til gamans að setja upp heimasíðu um mitt aðal áhugamál til fjölda ára, sleðasportið. Einhvern vegin vatt þetta smám saman upp á sig þannig að um tíma má segja að Sleðasíðan hafi verið hinn ágætasti miðill um sportið. Ég hef haft áhuga á sleðum nánast frá því að ég man eftir mér og sá áhugi er enn til staðar þótt hann hafi breyst þessa síðustu vetur sem ég hef verið sleðalaus. Myndin sem fylgir mér með er raunar táknræn fyrir minn sleðaferil nú um stundir en hann er að mestu byggður á munnmælum og sögusögnum. En þetta er sem sagt sleði sömu tegundar og ég ólst upp með, sænskur Sno-Tric, 18 hestöfl. Þessi sleði er nú kominn í eigu Smára Sig., sem einmitt hefur lagt til drjúgan hluta af efni síðunnar. Ég á eftir að skella mér á kaf í sleðasportið aftur en þá vil ég líka geta sinnt því af krafti.

       Ekki þarf glöggan mann til að sjá að Sleðasíðan hefur ekki verið lífleg upp á síðkastið og nú held ég að hreinlegast sé að setja punkt. Hún verður áfram í loftinu, um einhvern tíma a.m.k., enda margt efni á henni sem ekki má glatast. En um frekari uppfærslur verður ekki að ræða. Grípi mig óstöðvandi tjáningarþörf um sleðamál þá er auðvelt að fá hanni svalað á öðrum vettvangi. Lesendum síðunnar þessi tæp 8 ár þakka ég óteljandi góðar kveðjur. Síðast en ekki  síst þakka ég þeim sem lagt hafa til efnið á síðuna því aðeins brot af því er frá mér sjálfum komið. Sjáumst á fjöllum.              -Halldór.